شنۆ؛ دەستبەسەرکرانی دووبارەی مەولوود رووستا لە لایەن هێزە حکومەتییەکانەوە

شنۆ؛ دەستبەسەرکردنەوەی مەولوود ڕووستا لەلایەن هێزە ئەمنییەکانەوە

شەممە، ٢٩ی ۸ی ٢٠٢٦

هاووڵاتییەکی کورد و خەڵکی شاری شنۆ بەناوی مەولوود ڕووستا، بۆ دووەمین جار لە ماوەی ڕۆژانی ڕابردوودا، لەلایەن هێزە ئەمنییەکانی کۆماری ئیسلامیی ئێرانەوە دەستبەسەر کرا و بۆ شوێنێکی نادیار گواسترایەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی چوارشەممە ٢٦ی ۸ی ٢٠٢٦، مەولوود ڕووستا، خەڵکی گوندی «حەسەن نووران» سەر بە شاری شنۆ، لەلایەن هێزەکانی ئیدارەی ئیتلاعاتی کۆماری ئیسلامیی ئێرانەوە دەستبەسەر کرا.

پێشتر، لە ڕاپۆرتێکدا هاتووبوو کە مەولوود ڕووستا بەرەبەیانی دووشەممە ٢٤ی ۸ی ٢٠٢٦، بەبێ نیشاندانی هیچ بەڵگەیەکی دادوەری، لە ئەنجامی هێرشی هێزەکانی ئیدارەی ئیتلاعات بۆ سەر ماڵی بنەماڵەکەی دەستبەسەر کرابوو و دوای چەند کاتژمێر لێپرسینەوە، بەشێوەیەکی کاتی ئازاد کرابوو.

سەرەڕای تێپەڕبوونی چەند ڕۆژ بەسەر دووەمین دەستبەسەرکردنی مەولوود ڕووستا، هێشتا زانیارییەکی ورد لەبارەی هۆکاری دەستبەسەرکردنەکە، ئەو تۆمەتانەی لە دژی ئەو هاووڵاتییە خراونەتەڕوو و شوێنی ڕاگرتنی، لەبەردەستدا نییە.