دەستبەسەرکردنی مەنسوور کەربەلایی، هاووڵاتییەکی کوردی خەڵکی میاندواو، بۆ جێبەجێکردنی سزای ١٠ ساڵ زیندان

پێنجشەممە، ٢٧ی۸ی ٢٠٢٦

دەستبەسەرکردنی مەنسوور کەربەلایی، هاووڵاتییەکی کوردی خەڵکی میاندواو، بۆ جێبەجێکردنی سزای ١٠ ساڵ و ڕۆژێک زیندان

مەنسوور کەربەلایی، هاووڵاتییەکی کوردی تەمەن ٣٠ ساڵ و خەڵکی میاندواو، کە پێشتر بە حوکمی ١٠ ساڵ و ڕۆژێک زیندان سزا درابوو، بەبێ ئاگادارکردنەوەی پێشوەختە دەستبەسەر کرا و بۆ جێبەجێکردنی حوکمەکەی بۆ بەندیخانەی ناوەندیی بۆکان گواسترایەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی سێشەممە، ٢٥ی۸ی ٢٠٢٦، مەنسوور کەربەلایی، تەمەن ٣٠ ساڵ، خەڵکی گوندی «سەرچنار»ی سەر بە ساری میاندواو، بەبێ ئاگادارکردنەوەی پێشوەختە لەلایەن هێزە حکوومەتییەکانەوە دەستبەسەر کرا. ناوبراو سەرەتا بۆ دادگا گواسترایەوە و دواتر بۆ تێپەڕاندنی ماوەی سزای زیندانەکەی ڕادەستی بەندیخانەی ناوەندیی بۆکان کرا.

مەنسوور کەربەلایی لە مانگی یانزەی ٢٠٢٤دا، لەلایەن لقی یەکەمی دادگای شۆڕشی مەهاباد، بە سەرۆکایەتیی قازی ئەحەد سیامی، بە تۆمەتی «ئەندامێتی لە حیزبی دیموکراتی کوردستانی ئێران و هەوڵدان دژ بە ئاسایشی نەتەوەیی» بە ١٠ ساڵ و ڕۆژێک زیندان سزا درابوو.

لە هەمان دۆسیەی هاوبەشدا، کاوێس عەبدوڵڵازادە ئەقدەم بە تۆمەتی «بەغی» بە سێدارە (بە شێوەی یابی) و پێنج هاووڵاتیی دیکە بە ناوەکانی یووسف مام قادری، هێمن مام قادری، سالار بایزیدی ئازەر، حەسەن مامیل ئازەر و سالار سەید ڕەحیمی، هەر یەکەیان بە ١٠ ساڵ و ڕۆژێک زیندان سزا درابوون .

ئەم هاووڵاتییانە لە مانگی ٦ی ٢٠٢١دا لەلایەن هێزە ئەمنییەکانەوە دەستبەسەر کرابوون و بۆ دەستبەسەرگەی ئیدارەی ئیتلاعاتی ئورمیە گواسترابوونەوە. ناوبراوان لە ماوەی قۆناغەکانی لێپرسینەوەدا، بۆ سەپاندنی دانپێدانانی زۆرەملێ، ڕووبەڕووی ئەشکەنجەی دژوار کرابوون و لە مافی دەستڕاگەیشتن بە پارێزەر و چاوپێکەوتن لەگەڵ ئەندامانی بنەماڵەکانیان بێبەش کرابوون.

مەنسوور کەربەلایی دواتر بە دانانی بارمتەیەکی قورس بە شێوەیەکی کاتی ئازاد کرابوو.