دەستبەسەرکرانی ئەفشین تەوەسولی و کامەران جانگلی لە شارەکانی مەهاباد و شنۆ

چوارشەممە، ٢٦ی ۸ی ٢٠٢٦

لە درێژەی شەپۆلی دەستبەسەرکردنی هاووڵاتییانی کورد لەلایەن هێزە حکوومەتییەکانی کۆماری ئیسلامیی ئێرانەوە، لە ماوەی دوو ڕۆژی ڕابردوودا، لانی کەم دوو هاووڵاتیی کورد بە ناوەکانی ئەفشین تەوەسولی لە مەهاباد و کامەران جانگلی لە شنۆ، لەلایەن هێزە حکوومەتییەکانەوە دەستبەسەر کراون و بۆ شوێنێکی نادیار گواستراونەتەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، بەرەبەیانی ڕۆژی چوارشەممە، ٢٦ی ۸ی٢٠٢٦، هێزەکانی ئیدارەی ئیتلاعات لە شاری مەهاباد بە هەڵکوتانە سەر ماڵی بنەماڵەییی ئەفشین تەوەسولی، تەمەن ٥٠ ساڵ، بەبێ پیشاندانی هیچ جۆرە بەڵگەنامەیەکی دادوەری، ناوبراویان دەستبەسەر کردووە.

هەروەها، ئێوارەی دووشەممە، ٢٤ی ۸ی ٢٠٢٦، کامەران جانگلی، هاووڵاتییەکی خەڵکی شنۆ، لەلایەن هێزەکانی ئیدارەی ئیتلاعاتەوە لە ماڵی تایبەتیی خۆیدا دەستبەسەر کراوە و بۆ شوێنێکی نادیار گواستراوەتەوە.

تا کاتی بڵاوکردنەوەی ئەم ڕاپۆرتە، زانیارییەکی ورد لەسەر هۆکارەکانی دەستبەسەرکردن، تۆمەتە پاڵدراوەکان و شوێنی ڕاگرتنی ئەم دوو هاووڵاتییە بەردەست نییە.