سەردێڕ: هێرشی پاسەوانانی ئەخلاق بۆ سەر خێزانێک لە جوانڕۆ و ڕزگارکردنیان لەلایەن خەڵکەوە

چەند مۆتۆرسوارێک کە بە «سەلفییەکانی جوانڕۆ» ناسراون، لە شاری جوانڕۆی سەر بە پارێزگای کرماشانی ڕۆژهەڵاتی کوردستان، بە چەقۆ و دار هێرشیان کردە سەر ژن و مێردێک بە گومانی ئەوەی کە پەیوەندی هاوسەرگیرییان نییە، و داوای ناسنامەیان لێکردن.

رووداوەکە ڕۆژی دووشەممە ڕوویدا، کاتێک مامۆستایەکی خانەنشین لەگەڵ هاوژینەکەی بۆ نانخواردن سەردانی رێستۆرانتێکیان کردبوو، دوای دەرچوونیان لەوێ مۆتۆرسوارەکان کە خۆیان بە «پاسەوانی ئەخلاق» دازانی، کەوتنە دوایان.

سەرەڕای ئەوەی ژن و مێردەکە لە رێگەدا داوای هاوکارییان لە بازگەیەکی هێزە ئەمنیيەکان کرد، بەڵام ئەوان ڕەتیانکردەوە هاوکارییان بکەن و پێیان گوتن: «پەیوەندی بە ئێمەوە نییە و بچنە لای پۆلیس». لە کۆتاییدا، خەڵکی ناو شار بە هانایانەوە چوون و لە دەستی هێرشکەرەکان ڕزگاریان کردن.