دەستبەسەرکردنی دوو هاووڵاتیی کورد لەلایەن هێزە حکوومەتییەکانەوە لە بۆکان و میاندواو.

هەینی، ١٤ی ۸ی ٢٠٢٦

دوو هاووڵاتیی کورد بە ناوی محەممەد حاجی‌زادە و ئومێد چاوباز، لەلایەن هێزە حکوومەتییەکانی کۆماری ئیسلامیی ئێرانەوە لە شارەکانی بۆکان و میاندواو دەستبەسەر کراون و بۆ شوێنێکی نادیار گواستراونەتەوە.

بەپێی زانیارییەکانی گەیشتوو بە ڕێکخراوەکانی مافی مرۆڤ، کاتژمێر ١ی بەیانیی ڕۆژی هەینی، ١٤ی۸ی٢٠٢٦، ئومێد چاوباز، تەمەن ٤٥ ساڵ و خەڵکی بۆکان، لەلایەن هێزەکانی ئیدارەی ئیتڵاعاتەوە دەستبەسەر کراوە.

دەستبەسەرکردنی ئەم هاووڵاتییە لە کاتی هێرش و پشکنینی ماڵەکەی لەلایەن هێزەکانی ئیدارەی ئیتڵاعاتەوە و بەبێ پێشکەشکردنی هیچ بڕیار یان بەڵگەیەکی دادوەری ئەنجام دراوە.

لە لایەکی دیکەوە، کاتژمێر ٣ی بەیانیی ڕۆژی پێنجشەممە، ١٣ی ۸ی ٢٠٢٦، محەممەد حاجی‌زادە، تەمەن ٢٣ ساڵ و خەڵکی گوندی «گاومێش گلی»ی سەر بە میاندواو، لەلایەن هێزەکانی ئیدارەی ئیتڵاعاتەوە دەستبەسەر کراوە.

بەپێی ئەو زانیارییە، هەردوو هاووڵاتییەک تا ئێستا بۆ شوێنێکی نادیار گواستراونەتەوە و بەدواداچوونی بنەماڵەکانیان بۆ ئاگاداربوونەوە لە دۆخیان، هێشتا بێئەنجام ماوەتەوە.

تا کاتی بڵاوکردنەوەی ئەم ڕاپۆرتە، هیچ زانیارییەکی ورد و پشتڕاستکراوە لەبارەی هۆکاری دەستبەسەرکردن، تۆمەتە ئاراستەکراوەکان، شوێنی ڕاگرتن و دۆخی ئێستای ئەم دوو هاووڵاتییە بەردەست نییە.