سەقز؛ دەستبەسەرکردنی ناهید کەسنەزانی لەلایەن هێزە حکوومەتییەکانەوە

سەقز؛ دەستبەسەرکردنی ناهید کەسنەزانی لەلایەن هێزە حکوومەتییەکانەوە

چوارشەممە،۲ی۹ی ٢٠٢٦

ژنێکی کورد بە ناوی ناهید کەسنەزانی، تەمەن ٤٨ ساڵ، خەڵکی گوندی «کەسنەزان»ی سەر بە سەقز، دوای گەمارۆدانی تەواوی گوندەکە لەلایەن هێزە حکوومەتییەکانی کۆماری ئیسلامیی ئێرانەوە، بە بەکارهێنانی توندوتیژی دەستبەسەر کرا و بۆ شوێنێکی نادیار گواسترایەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی سێشەممە ١ی۹ی٢٠٢٦، ناهید کەسنەزانی، هاووڵاتییەکی ٤٨ ساڵەی خەڵکی گوندی کەسنەزان، لەلایەن هێزە حکوومەتییەکانەوە دەستبەسەر کرا و تا ئێستا چارەنووسی نادیارە.

بەپێی وتەی سەرچاوە ئاگادارەکان، هێزە حکوومەتییەکان بەبێ پیشاندانی هیچ پەڕە یان بڕیارێکی دادوەری، سەرەتا گوندی کەسنەزانیان بە تەواوی گەمارۆ داوە و دواتر بە بەکارهێنانی توندوتیژییەکی لەڕادەبەدەر، ناهید کەسنەزانیان دەستبەسەر کردووە.

هەروەها، لە کاتی ئەم هەڵمەتەدا، هێزە حکوومەتییەکان بنەماڵەی کەسنەزانیان خستووەتە ژێر گوشار و هەڕەشە و ناچاریان کردوون کە مۆبایل و کەلوپەلە تایبەتییەکانی دیکەی ناوبراویان ڕادەستی هێزەکان بکەن.

تا کاتی بڵاوکردنەوەی ئەم ڕاپۆرتە، زانیارییەکی ورد لەبارەی هۆکاری دەستبەسەرکردن، تۆمەتە پاڵێوراوەکان، دامەزراوەی دەستبەسەرکەر و شوێنی ڕاگرتنی ناهید کەسنەزانی لەبەردەست نییە. هەروەها، بێئاگایی لە چارەنووس و دۆخی ناوبراو، نیگەرانیی بنەماڵەکەی زیاتر کردووە.