شنۆ؛ کەیوان ڕەسوولی ئازەر سزای دوو ساڵ بەندکرانی بەسەردا سەپا

دووشەممە، ١۲ی۱٠ی ٢٠٢٦

کەیوان ڕەسوولی ئازەر، هاووڵاتییەکی کوردی خەڵکی شاری شنۆ، لەلایەن دەزگای دادوەریی کۆماری ئیسلامیی ئێرانەوە بە دوو ساڵ بەندکران سزا درا.

بەپێی ڕاپۆرتە گەیشتووەکان بە ڕێکخراوەکانی مافی مرۆڤ، کەیوان ڕەسوولی ئازەر، هاووڵاتییەکی ٤٣ ساڵەی خەڵکی شاری شنۆ و باوکی یەک منداڵ، لەلایەن لقی یەکەمی دادگای شۆڕشی ئەم شارەوە، بە سەرۆکایەتیی دادوەر عەلی ئەنساری، بە دوو ساڵ بەندکران سزا  دراوە.

بەپێی ئەو زانیارییانەی کە بەدەست ڕێکخراوەکانی مافی مرۆڤ کەوتووە، کەیوان ڕەسوولی ئازەر پێشتر کارمەندی شارەوانیی شنۆ بووە و ناردنی زانیاری بۆ ڕاگەیاندنەکانی دەرەوەی ئێران، یەکێک بووە لەو تۆمەتانەی کە خرابوونە پاڵی.

شایانی باسە، کەیوان ڕەسوولی ئازەر پێشتر، لە ٢ی ۱۲ی ٢٠٢٥، لەلایەن هێزە حکوومەتییەکانەوە دەستبەسەر کرابوو و دوای ماوەیەک، بە دانانی بارمتە و بە شێوەی کاتی، تا کۆتایی قۆناغەکانی دادڕەسی ئازاد کرابوو.