منداڵێک لە سنووری هەورامان بە تەقەی هێزەکانی ئێران کوژرا و باوکیشی بریندارە
هێزە چەکدارەکانی ئێران لە ناوچە سنوورییەکانی شاری سەوڵاوا دەستڕێژی گولەیان لە ئۆتۆمبێلی خێزانێکی جووتیار کرد و لە ئەنجامدا مێردمنداڵێکی 15 ساڵان کوژرا و باوکیشی بە سەختی بریندار بوو.
زانیاریی بەدەستهاتوو: بەپێی زانیاریی سەرچاوە خۆجێیەکان، ئێوارەی ڕۆژی پێنجشەممە، هێزەکانی پاسەوانی سنووری ئێران کە لە گوندی دەرەکێ جێگیرن، لە ناوچەی دەرە ئەسحابە ئۆتۆمبێلی خێزانێکیان بەبێ هیچ ئاگادارکردنەوەیەکی پێشوەختە داوەتە بەر دەستڕێژی گولە. لە ئاکامدا سام حەسەنی تەمەن 15 ساڵ گولە بەر سەری کەوتووە و دەستبەجێ گیانی لەدەستداوە، هەروەها ئەحسەن حەسەنیی باوکیشی بە سەختی بریندار بووە و باری تەندروستیی ناجێگیرە.
بڵاوکراوەی فەرمی: بەپێی ڕاپۆرتی ڕێکخراوی مافەکانی مرۆڤی هەنگا"، ئەو باوک و کوڕە لە باخی گێلاسەکەی خۆیان کاریان کردووە، بەڵام ئێوارە دوای تەواوبوونی کارەکەیان و لە کاتی گەڕانەوەیان بەرەو ماڵ کراونەتە ئامانجی تەقەی ئەو هێزانە.
ئەوەی پێویستە بیزانیت: لە ئێستادا تەرمی سام ڕەوانەی ساردخانەی نەخۆشخانەی بووعەلی لە شاری مەریوان کراوە و باوکیشی لە هەمان نەخۆشخانە لەژێر چاودێریی پزیشکیدایە. تاوەکو ئێستا لایەنە فەرمییەکانی ئێران هیچ ڕوونکردنەوەیەکیان لەسەر هۆکاری تەقەکردن لەو ئۆتۆمبێلە مەدەنییە بڵاو نەکردووەتەوە.
بۆچوونەکان
هێشتا هیچ بۆچوونێک نییە. یەکەم کەس بە!
بەناوبانگەکان
نوێترین بابەتەکان
