بانە؛ کۆژرانی کۆڵبەرێک بە ناوی مووسا زیباپوور بە تەقەی ڕاستەوخۆی هێزە چەکدارەکانی ئێران.

پێنجشەممە، ١٣ی ۸ی ٢٠٢٦

کۆڵبەرێکی کورد بە ناوی مووسا زیباپوور، خەڵکی شاری پیرانشار و باوکی سێ منداڵ، بە تەقەی ڕاستەوخۆی هێزەکانی پاسەوانی سنووری کۆماری ئیسلامیی ئێران لە بەرزاییە سنوورییەکانی شاری بانە کوژرا.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی پێنجشەممە، ١٣ی ۸ی٢٠٢٦، هێزەکانی پاسەوانی سنووری جێگیر لە سنووری هەنگەژاڵی شاری بانە، تەقەیان لە ژمارەیەک کۆڵبەر کردووە. لە ئەنجامی ئەم تەقەکردنەدا، کۆڵبەرێکی خەڵکی پیرانشار بە ناوی مووسا زیباپوور، کە خێزاندار و باوکی سێ منداڵ بوو، گیانی لەدەست دا.

بەپێی وتەی سەرچاوەکانی ڕێکخراوەکانی مافی مرۆڤ، ئەم کۆڵبەرە نزیکەی کاتژمێر ٤ی پاشنیوەڕۆ کوژراوە و تا کاتی بڵاوکردنەوەی ئەم هەواڵە، تەرمی نەدراوەتەوە بە بنەماڵەکەی.

جێگای ئاماژەیە کە مووسا زیباپوور پێشتر، لە ڕێکەوتی ١٤ی ۷ی ٢٠٢٥، لە ئەنجامی تەقەی هێزە چەکدارەکانی حکوومەت لە سنووری «ماشکان»ی پیرانشار، بە سەختی بریندار کرابوو.