دەستبەسەرکردنی مەسعوود ئالانی، گۆرانیبێژی کورد، لە شنۆ شنۆ؛ مەسعوود ئالانی، گۆرانیبێژی کورد، لەلایەن هێزە ئەمنییەکانی حکوومەتەوە دەستبەسەر کراوە و دواتر بۆ شوێنێکی نادیار گواستراوەتەوە

دەستبەسەرکردنی مەسعوود ئالانی کۆنەقەڵا، گۆرانیبێژی کورد، لە شنۆ

شەممە، ١٥ی ۸ی ٢٠٢٦ — «مەسعوود ئالانی کۆنەقەڵا»، گۆرانیبێژی کورد و خەڵکی گوندی «سینگان» و دانیشتووی شنۆ، لەلایەن هێزە ئەمنییەکانی ئیدارەی ئیتلاعاتەوە بەبێ هیچ بەڵگە و ڕێکارێکی یاسایی دەستبەسەر کراوە و بۆ شوێنێکی نادیارگواستراوەتەوە.

بەپێی زانیارییە بەردەستەکان، دوانیوەڕۆی شەممە ١٥ی ۸ی ٢٠٢٦، ئەم گۆرانیبێژە کوردە لە یەکێک لە کافەکانی شاری شنۆ لەلایەن هێزە ئەمنییەکانەوە دەستبەسەر کراوە و بۆ شوێنێکی نادیار گواستراوەتەوە.

دواتر هێزە ئەمنییەکان هەڵیانکوتاوەتە سەر ماڵی ناوبراو لە شنۆ و بەبێ بەڵگەی یاسایی، مۆبایلی هاوسەر و کچەکەشیان دەستبەسەر کردووە و لەگەڵ خۆیان بردووە.

تا کاتی بڵاوبوونەوەی ئەم هەواڵە، هیچ زانیارییەکی ڕوون سەبارەت بە هۆکاری دەستبەسەرکردنی مەسعوود ئالانی کۆنەقەڵا و تۆمەتە وەپاڵدراوەکان دژی ئەو لەبەردەستدا نییە. هەروەها هێزە ئەمنییەکان هیچ ڕوونکردنەوەیەکی فەرمییان لەمبارەیەوە نەداوە.

مەسعوود ئالانی کۆنەقەڵا لە ماوەی دەستبەسەرکردنەکەیدا لە مافی دەستڕاگەیشتن بە پارێزەر، دیدار و پەیوەندی لەگەڵ ئەندامانی بنەماڵەکەی بێبەش کراوە.

ناوبراو یەکێکە لە گۆرانیبێژە ناسراوەکانی شنۆ و بەهۆی چڕین و پێشکەشکردنی گۆرانیی کوردی بە شێوازی نیشتیمانی، پێشتر چەندین جار لەلایەن هێزە ئەمنییەکانەوە بانگ کراوە و دەستبەسەر کراوە.