بانە: کوژرانی ئارمان خالق‌پەنا هاووڵاتیی خەڵکی سەقز و دەستبەسەرکردنی سێ هاووڵاتیی دیکە لەلایەن سوپای پاسدارانەوە

هاووڵاتییەکی کورد و خەڵکی سەقز بە ناوی "ئارمان خالق‌پەنا" لەلایەن هێزەکانی سوپای پاسدارانەوە لە دەوروبەری شاری بانە کوژرا. لە هەمان ڕووداویشدا سێ هاووڵاتیی دیکە بە ناوەکانی "عەبدوڵڵا مەهجوور"، "سالار ئازەر" و "شێخ زاهید شەهابی" دەستبەسەر کران.

ڕێکخراوەکانی مافی مرۆڤ ڕایان گەیاندووە کە ئەم ڕووداوە ڕۆژی چوارشەممە ٢٠ی ڕەشەممەی ٢٧٢٥ (١١ی مارسی ٢٠٢٦) ڕووی داوە. هێزەکانی سوپای پاسداران ئۆتۆمبێلەکەیان گەمارۆ داوە و دەستبەجێ تەقەیان لێ کردووە. لە ئەنجامدا شۆفێرەکە (ئارمان خالق‌پەنا) گیانی لە دەست داوە.

سێ سەرنشینەکەی دیکەی ئۆتۆمبێلەکەش، کە هەموویان خەڵکی سەقز بوون، بە توندوتیژی دەستبەسەر کراون. ناسنامەی ئەم سێ کەسە لەلایەن ڕێکخراوەکانی مافی مرۆڤەوە پشتڕاست کراوەتەوە، کە بریتین لە: عەبدوڵڵا مەهجوور (بەندکراوی سیاسیی پێشوو)، سالار ئازەر، و شێخ زاهید شەهابی (چالاکی ئایینیی کوردستان).

بەپێی زانیارییەکان، تا ئێستا تەرمی ئارمان خالق‌پەنا ڕادەستی بنەماڵەکەی نەکراوەتەوە. هەروەها، سەرەڕای تێپەڕبوونی پێنج ڕۆژ بەسەر دەستبەسەرکردنیاندا، چارەنووس و شوێنی ڕاگرتنی سێ هاووڵاتییە دەستبەسەرکراوەکە نادیارە و بەدواداچوونی بنەماڵەکانیان بێئاکام بووە.

دوابەدوای دەستبەسەرکردنەکە، هێزەکانی ئیتلاعاتی سوپا هەڵیان کوتایە سەر ماڵی بنەماڵەی دەستبەسەرکراوەکان و پشکنینیان بۆ کردوون، کە کەشێکی ترس و تۆقاندنی دروست کردووە. پشکنین لە ماڵی بنەماڵەی شەهابی زۆر توندوتیژ بووە و بەهۆی شێواویی زۆری ماڵەکەوە و هەڕەشەی هێزەکان، ئەندامانی بنەماڵەکە ناچار بوون ماڵەکە چۆڵ بکەن.

ئەم ڕووداوە لە چوارچێوەی زیادبوونی میلیشیاکان و پشکنینەکان لە کوردستاندا دێت، کە لە نزیکەی مانگێک لەمەوبەرەوە و بەتایبەت دوای ڕاگەیاندنی هاوپەیمانیی پارتە سیاسییەکانی کوردستانی ئێران و پەرەسەندنی ئاڵۆزییەکان لە ناوچەکەدا، لەلایەن سوپای پاسدارانەوە دەستی پێ کراوە.