پاوه؛ برینداربوونی هاووڵاتییەک بەهۆی تەقینەوەی مین لە بەرزاییەکانی مەڕەخێڵ

سێشەممە، ١ی۹ی ٢٠٢٦

هاووڵاتییەک لە کاتی بەشداری‌کردن لە کۆنترۆڵکردن و کوژاندنەوەی ئاگری دارستانەکانی زاگرۆس، لە ناوچەی سەنووریی «مەڕەخێڵ»ی سەر بە شاری پاوە، بەهۆی تەقینەوەی مینێکی بەجێماو لە سەردەمی شەڕی هەشت‌ساڵەی ئێران و عێراق، بە سەختی بریندار بوو.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی دووشەممە، ٣١ی ۸ی ٢٠٢٦، لە کاتێکدا کۆمەڵێک لە هاووڵاتییان و چالاکانی ژینگەپارێز بۆ کوژاندنەوەی ئاگری کەوتووەتە ناوچەی لەوەرگە و دارستانەکانی مەڕەخێڵی پاوە ئامادە بوون، مینێک تەقییەوە و بووە هۆی برینداربوونی هاووڵاتییەک. ناسنامەی ئەم هاووڵاتییە هێشتا دیاری نەکراوە و لەلایەن ڕێکخراوەکانی مافی مرۆڤەوە بەدواداچوونی بۆ دەکرێت.

بەردەوامبوونی هەبوونی مینە چێنراوەکان و نەپاککردنەوەی تەواو و ستانداردی ناوچە سەنوورییەکان، ساڵانە دەبێتە هۆی کوژران و کەمئەندامبوونی دەیان کەس لە هاووڵاتییان، چالاکانی ژینگەپارێز و کۆڵبەران.

کۆماری ئیسلامیی ئێران، سەرەڕای تێپەڕبوونی دەیان ساڵ بەسەر کۆتایی شەڕی هەشت‌ساڵەی ئێران و عێراقدا، هێشتا بە تەواوی پابەندی بە پەیماننامە و بەرپرسیارێتییە نێودەوڵەتییەکانی خۆی لەبارەی پاککردنەوەی ئەم ناوچانە و بەکارهێنانی کەلوپەلی پێشکەوتوو نەبووە.