سنە؛ بەردەوامیی دەستبەسەرکردنی مۆنا مەلەکی و نادیاریی چارەنووسی لە ژوورە تاکەکەسییەکانی بەندیخانەی ناوەندیی سنە.

هەینی، ٣١/۷/ ٢٠٢٦

دوای تێپەڕبوونی زیاتر لە دوو حەفتە لە کاتی دەستبەسەرکرانی، مۆنا مەلەکی، هاووڵاتییەکی ٢٧ ساڵەی خەڵکی شاری سنە، هێشتا بە چارەنووسێکی نادیار لە ژوورە تاکەکەسییەکانی بەندی ژنانی بەندیخانەی ناوەندیی ئەم شارەدا ڕادەگیرێت.

بەپێی زانیارییەکانی گەیشتوو بە ڕێکخراوەکانی مافی مرۆڤ، ڕۆژی سێشەممە، ١٤/۷/٢٠٢٦، هێزەکانی ئیدارەی ئیتلاعات بەبێ پیشاندانی هیچ بڕیارێکی دادوەری، هەڵیانکوتایە سەر ماڵی بنەماڵەیی مۆنا مەلەکی لە شاری سنە و دەستیان بەسەردا گرت.

دوای دەستبەسەرکران، مۆنا مەلەکی ڕاستەوخۆ بۆ ژوورە تاکەکەسییەکانی بەندی ژنانی بەندیخانەی ناوەندیی سنە ــ کە ڕاگەیاندنە فەرمییەکانی حکوومەت بە ناوی «ناوەندی چاکسازی و پەروەردەی سنە» ناساندوویانە ــ گوازرایەوە و لە ماوەی ڕابردوودا لە ژێر فشار و لێپرسینەوەی بەردەوامدا بووە.

بەپێی زانیارییەکان، دوای تێپەڕبوونی ١٧ ڕۆژ لە دەستبەسەرکرانی، ئەم هاووڵاتییە ٢٧ ساڵە هێشتا لە مافی دەستڕاگەیشتن بە پارێزەری هەڵبژێردراوی خۆی، چاوپێکەوتنی ڕووبەڕوو و پەیوەندیی تەلەفۆنیی بەردەوام لەگەڵ بنەماڵەکەی بێبەشە.

هەتا کاتی ئامادەکردنی ئەم ڕاپۆرتە، هۆکاری دەستبەسەرکرانی مۆنا مەلەکی و تۆمەتە ئاراستەکراوەکان بەرامبەری، بە فەرمی ڕانەگەیەندراون و هێشتا هیچ زانیارییەکی ورد لەو بارەیەوە بڵاونەکراوەتەوە.