سنە؛ دەستبەسەرکردنی داریوش ڕەحیمی لەلایەن هێزە حکومییەکانەوە

یەکشەممە، ١٦ی ۸ی ٢٠٢٦

هاووڵاتییەکی کورد بە ناوی داریوش ڕەحیمی، لە دوای هێرشی هێزە حکومەتییەکان بۆ سەر ماڵی تایبەتیی خۆی لە شاری سنە، بە بەکارهێنانی توندوتیژی دەستبەسەر کرا و بۆ شوێنێکی نادیار گواسترایەوە.

بەپێی ڕاپۆرتی گەیشتوو بە ڕێکخراوەکانی مافی مرۆڤ، ڕۆژی شەممە ١٥ی ۸ی٢٠٢٦، هێزە حکومەتییەکان بەبێ پیشاندانی هیچ جۆرە بەڵگەنامە یان حوکمێکی دادوەری، چوونەتە ناو ماڵی داریوش ڕەحیمی و بە بەکارهێنانی توندوتیژی، ناوبراویان دەستبەسەر کردووە.

بەپێی وتەی سەرچاوەیەکی نزیک لە بنەماڵەی ڕەحیمی، هێزە حکومەتییەکان لەگەڵ پشکنینی تەواوی ماڵەکە، مۆبایلی داریوش ڕەحیمی و مۆبایلی هاوسەرەکەشیان دەستبەسەر کردووە و لەگەڵ خۆیان بردوویانە.

تا کاتی بڵاوکردنەوەی ئەم ڕاپۆرتە، زانیارییەکی ورد لەبارەی هۆکاری دەستبەسەرکردنی داریوش ڕەحیمی، تۆمەتەکان ئاراستەکراوەکان و شوێنی ڕاگرتنی ئەو لەبەردەستدا نییە.