دەڕەشار؛ دەستبەسەرکردنی ماهان سەیفی، گەنجێکی ١٨ ساڵەی کورد، لەلایەن هێزە حکوومەتییەکانەوە

هەینی، ٣١/۷/٢٠٢٦

گەنجێکی ١٨ ساڵەی کورد بە ناوی ماهان سەیفی، خەڵکی شاری دەڕەشار لە پارێزگای ئیلام، لەلایەن هێزە ئەمنییەکانی کۆماری ئیسلامیی ئێرانەوە دەستبەسەر کرا و بۆ شوێنێکی نادیار گوازرایەوە.

بەپێی زانیاریی گەیشتوو بە ڕێکخراوەکانی مافی مرۆڤ، ڕۆژی چوارشەممە ٢٩/۷/ ٢٠٢٦، ماهان سەیفی، گەنجێکی ١٨ ساڵە، لەلایەن هێزە حکوومەتییەکانەوە دەستبەسەر کراوە.

بەپێی زانیاریی بەدەستهاتوو، ئەم گەنجە لە ڕۆژانی ڕابردوودا لە تۆڕە کۆمەڵایەتییەکانی خۆیدا پۆست و بابەتگەلێکی ناڕەزایەتی سەبارەت بە گرانی و هەڵئاوسانی دۆخی ئابووری بڵاو کردبووەوە.

تا کاتی ئامادەکردنی ئەم هەواڵە، هێشتا هیچ زانیارییەکی فەرمی لەبارەی هۆکاری دەستبەسەرکردنی، ئەو ناوەندەی کە دەستی بەسەردا گرتووە، تۆمەتە ئاراستەکراوەکان و شوێنی ڕاگرتنی ماهان سەیفی بڵاونەکراونەتەوە. هەروەها، هەوڵەکانی بنەماڵەکەی بۆ ئاگاداربوونەوە لە چارەنووسی کوڕەکەیان، تا ئێستا بێ ئەنجام ماونەتەوە.