کەناڵی 12ی ئیسرائیل: پلانی وەستاندنی شەڕ بۆ 60 ڕۆژ و دەستپێکردنەوەی دانوستانەکانی ئەمریکا و ئێران

Khandan Telegraph

بەپێی ڕاپۆرتی کەناڵی 12ی ئیسرائیل، چاوەڕوان دەکرێت بۆ ماوەی 60 ڕۆژ ئاگرەبەستێکی کاتی لەنێوان ئەمریکا و ئێران جێبەجێ بکرێت، بۆ ئەوەی دەرفەت بڕەخسێت بۆ دەستپێکردنەوەی دانوستانە ناڕاستەوخۆکان و گەیشتن بە ڕێککەوتنێکی نوێ لەسەر بنەمای یاداشتنامەی لێکتێگەیشتن.

هەمان ڕاپۆرت ئاماژە دەدات کە لە ماوەی ئەم ئاگرەبەستەدا، گەرووی هورمز بە کراوەیی دەمێنێتەوە و هیچ جۆرە باج یان سنووردارکردنێک لەسەر کەشتییە بازرگانییەکان جێبەجێ ناکرێت؛ بابەتێک کە دەتوانێت ئارامی زیاتر بۆ بازاڕی نەوت و بازرگانیی جیهانی دابین بکات.

لە هەمان کاتدا، زانیارییەکان باس لەوە دەکەن کە شاندە دانوستانکارەکانی عومان و قەتەر چەند ڕۆژە لەگەڵ بەرپرسانی ئێران کۆبوونەتەوە، بۆ ئامادەکردنی زەمینەی دەستپێکردنەوەی گفتوگۆکانی نێوان واشینگتۆن و تەهران لە ماوەی ئەم 60 ڕۆژەدا.

تا ئێستا، هیچ لایەنێکی فەرمی لە واشینگتۆن یان تەهران ئەم زانیارییانەی پشتڕاست نەکردووەتەوە، بەڵام ئەگەر ئەم هەنگاوە جێبەجێ بکرێت، دەتوانێت ببێتە یەکێک لە گرنگترین پێشکەوتنە دیپلۆماسییەکانی ناوچە لە ماوەی دوایی.

ئامادەکردن:
ئاری محەمەد (Ari Mohamad)
دامەزرێنەری Khandan Telegraph