مەهاباد؛ دەستبەسەرکردنی خوێندکاری کورد، میلاد مروەتی، لەلایەن هێزە حکوومەتییەکانەوە.

چوارشەممە، ٢٩/۷/٢٠٢٦

میلاد مروەتی، خوێندکاری بەشی یاسا، خەڵکی مەهاباد و بەڕێوەبەری کتێبفرۆشیی «هێڤی»، لەلایەن هێزە حکوومەتییەکانەوە دەستبەسەر کرا و بۆ شوێنێکی نادیار گواسترایەوە.

بەپێی زانیارییە گەیشتووەکان بە ڕێکخراوەکانی مافی مرۆڤ، ڕۆژی سێشەممە۲۸/۷/٢٠٢٦، هێزەکانی ئیدارەی ئیتڵاعات، بەبێ پێشکەشکردنی هیچ بڕیارێکی دادوەری، میلاد مروەتییان لە شوێنی کارەکەی، لە کتێبفرۆشیی «هێڤی»، دەستبەسەر کردووە.

بەپێی وتەی سەرچاوە ئاگادارەکان، هێزە حکوومەتییەکان هاوکات لەگەڵ دەستبەسەرکردنی میلاد مروەتی، شوێنی کارەکەشیان بە تەواوی پشکنین کردووە و دەستیان بەسەر هەندێک لە کەلوپەلە کەسییەکانی، لەوانە لاپتۆپ و ئامێرە ئەلیکترۆنییەکان، گرتووە و لەگەڵ خۆیان بردوویانە.

تا کاتی بڵاوکردنەوەی ئەم ڕاپۆرتە، هیچ زانیارییەکی ورد لەبارەی هۆکاری دەستبەسەرکردنی میلاد مروەتی، دامەزراوەی دەستبەسەرکەر، تۆمەتە ئاراستەکراوەکان و شوێنی ڕاگرتنی ئەم خوێندکارەی زانکۆی ئازادی مەهاباد لەبەردەست نییە. هەروەها، بەدواداچوونی بنەماڵەکەی بۆ ئاگاداربوون لە چارەنووسی، شوێنی ڕاگرتن و دۆخی ئەو، تا ئێستا بێئاکام ماوەتەوە