جێبەجێکرانی سزای لەسێدارەدانی ئەیووب موحێبی، زیندانییەکی خەڵکی نوورئاوا

سزای لەسێدارەدانی ئەیووب موحێبی،زیندانییەکی  کوردی خەڵکی نوورئاوا، جێبەجێ کرا

سزای لەسێدارەدانی ئەیووب موحێبی، زیندانییەکی کوردی تەمەن ٤٠ ساڵ و خەڵکی شاری نوورئاوا (دۆلفان)، کە پێشتر بە تۆمەتی «کوشتنی ئەنقەست» بە سزای لەسێدارەدانی بەسەردا سەپێندرابوو، لە بەندیخانەی قزڵحەساری کەرەج جێبەجێ کرا.

بەپێی ڕاپۆرتی گەیشتوو بە ڕێکخراوەکانی مافی مرۆڤ، بەرەبەیانی ڕۆژی سێشەممە، ٢١/۷/٢٠٢٦، سزای لەسێدارەدانی ئەیووب موحێبی، خەڵکی دۆلفان، لە بەندیخانەی قزڵحەساری کەرەج جێبەجێ کرا.

بەپێی وتەی سەرچاوە ئاگادارەکان، ئەیووب موحێبی لە ساڵی ٢٠٢٢ بە تۆمەتی کوشتنی کەسێک لە ڕەوتی پێکدادانێکی سەرشەقامدا دەستبەسەر کرابوو. بەپێی ئەو زانیارییە، ناوبراو تۆمەتبار کرابوو کە لە ڕەوتی ئەو پێکدادانەدا، بەبێ مەبەستی پێشوەختە، بووەتە هۆی مردنی کەسێک. بەڵام لە کۆتاییدا، بەهۆی نەبوونی ڕەزامەندیی بنەماڵەی قوربانییەکە بۆ لێخۆشبوون، لەلایەن دەزگای دادوەرییەوە سزای لەسێدارەدانی بەسەردا سەپێندرا.

تا کاتی ئامادەکردن و بڵاوکردنەوەی ئەم ڕاپۆرتە، هەواڵی جێبەجێکردنی سزای لەسێدارەدانی ئەم بەندکراوە لەلایەن ڕاگەیاندنە فەرمییەکانی ناوخۆی ئێران یان دامەزراوەکانی سەر بە دەزگای دادوەرییەوە ڕانەگەیەندراوە.