کردنەوەی دۆسیەیەکی دادوەریی نوێ و بانگهێشتکردنی عەلی پوورداراب، ڕۆژنامەنووسی خەڵکی کرماشان، بۆ دادگا

پێنجشەممە، ۸/٦/ ٢٠٢٦

داواکاری گشتی و شۆڕشی پارێزگای کرماشان، بە خستنەپاڵی تۆمەتی «پڕوپاگەندە دژ بە نیزام»، دۆسیەیەکی دادوەریی نوێی دژی عەلی پوورداراب، هاووڵاتیی کورد و ڕۆژنامەنووسی دانیشتووی ئەم شارە، کردنەوە.

بەپێی زانیاریی گەیشتوو بە ڕێکخراوەکانی مافی مرۆڤ، ڕۆژی شەممە، ١ی ۸ی٢٠٢٦، ئاگادارییەکی فەرمی بۆ عەلی پوورداراب دەرکراوە و تێیدا داوای لێکراوە بۆ ئامادەبوون لە دادگا.

بەپێی وتەی سەرچاوە ئاگادارەکان، ئەم دۆسیەیە ڕەوانەی لقی ١٦ی لێپرسینەوەی دادگای گشتی و شۆڕشی پارێزگای کرماشانکراوە. لە دەقی ئاگادارییەکەدا هاتووە کە ناوبراو دەبێت لە ماوەی پێنج ڕۆژ دوای وەرگرتنی ئاگادارییەکە، بۆ ڕاگەیاندنی تۆمەتی «پڕوپاگەندە دژ بە نیزام» و پێشکەشکردنی بەرگرییەکانی خۆی، لە لقەکە ئامادە بێت.

عەلی پوورداراب یەکێکە لە ڕۆژنامەنووسە سەربەخۆ و چالاکە ناسراوەکانی کرماشان کە لە ساڵانی ڕابردوودا بە شێوەیەکی بەردەوام خەریکی ڕوومالکردنی هەواڵ، بەدواداچوونی بابەتە یاساییەکان و ڕەنگدانەوەی هەواڵە پەیوەندیدارەکان بە گیانبەختکراوانی ناڕەزایەتییە سەراسەرییەکان و دۆخی بنەماڵە دادخوازەکان بووە.

بانگهێشتکردنی عەلی پوورداراب بۆ دادگا لە کاتێکدایە کە زەخت و گوشارە ئەمنییەکان لەسەر ڕۆژنامەنووسان و چالاکانی مەدەنی لە ئێران بەردەوام لە زیادبووندایە.