عەلی بەراتی، هاووڵاتییەکی کوردی کرمانج و یەکێک لە دەستبەسەرکراوانی ناڕەزایەتییەکانی مانگی ۱، بە ٣ ساڵ و ٨ مانگ زیندانی سزا درا.

بۆجنوورد؛ عەلی بەراتی، لاوێکی ٢٥ ساڵەی کوردی کرمانج و یەکێک لە دەستبەسەرکراوانی ناڕەزایەتییەکانی مانگی ۱، بە ٣ ساڵ و ٨ مانگ زیندان مەحکوم کرا

عەلی بەراتی، لاوێکی ٢٥ ساڵەی کوردی کرمانج و یەکێک لە دەستبەسەرکراوانی ناڕەزایەتییەکانی مانگی ۱/٢٠٢٦، لەلایەن یەکێک لە لقەکانی دادگای ئینقلابی شاری بۆجنوورد، بە سەرۆکایەتی دادوەر «لاجوەردی»، بە تۆمەتی «کۆبوونەوە و پیلانگێڕی دژی ئاسایشی نەتەوەیی» و بەبێ دابینکردنی مافی دەستڕاگەیشتن بە پارێزەر، بە ٣ ساڵ و ٨ مانگ زیندان سزا دراوە.

بەپێی زانیارییەکانی سەرچاوەیەکی ئاگادار، عەلی بەراتی لە ۲/۸/ ٢٠٢٦، بەبێ ئەوەی هیچ بەڵگەیەکی یاسایی بۆ دەستبەسەرکردنەکەی پێشکەش بکرێت، لەلایەن هێزە ئەمنییەکانەوە دەستبەسەر کرا و بۆ شوێنێکی نادیار گوازرایەوە.

ناوبراو دوای تێپەڕبوونی یەک هەفتە لە دەستبەسەرکردنی سەرەڕۆیانەکەی، لە ۲/۱٤/ ٢٠٢٦ بە دانانی بارمتەی ٣ میلیارد تمەن بە شێوەیەکی کاتی ئازاد کرا.

لە ماوەی دەستبەسەرکردنەکەیدا، ئەم لاوە کوردە لە مافی دەستڕاگەیشتن بە پارێزەر و پەیوەندی‌کردن بە خێزانەکەی بێبەش کراوە. هەروەها، لە تەواوی قۆناغەکانی پێڕاگەیشتن بە دۆسیەکەی لە دادگا، لە مافی هەبوونی پارێزەر بێبەش بووە.