سنووری مەریوان؛ مادێح کرمانی، کۆڵبەرێکی کورد، لەلایەن هێزەکانی کۆماری ئیسلامیی ئێرانەوە کوژرا

پێنجشەممە، ٣٠/۷/٢٠٢٦

کۆڵبەرێکی کورد بە ناوی مادێح کرمانی، خەڵکی شاری مەریوان، سێ ڕۆژ پێش لە کاتی کۆڵبەریدا لە سنووری باشماخ بە هۆی تەقەی ڕاستەوخۆی هێزە چەکدارەکانی کۆماری ئیسلامیی ئێرانەوە گیانی لەدەست دا و تەرمەکەی دوای سێ ڕۆژ ڕادەستی بنەماڵەکەی کرایەوە.

بەپێی زانیاریی گەیشتوو بە ڕێکخراوەکانی مافی مرۆڤ، مادێح کرمانی ڕۆژی سێشەممە، ۷/۲۸/٢٠٢٦، لە سنووری باشماخی مەریوان بووە ئامانجی تەقەی ڕاستەوخۆی هێزەکانی هەنگی سنووری و لە شوێنی ڕووداوەکەدا گیانی لەدەست دا.

بەپێی سەرچاوە ئاگادارەکان، ئەم کۆڵبەرە بە فیشەک لە ناوچەی سەرییەوە بریندار کرا و لە هەمان شوێندا گیانبەخت کرد. دوای ڕووداوەکە، هێزە چەکدارەکانی کۆماری ئیسلامیی ئێران تەرمەکەیان دەستی بەسەردا گرت و بنەماڵەکەی بۆ ماوەی سێ ڕۆژ هیچ زانیارییەکیان لەبارەی چارەنووس و شوێنی ڕاگرتنی تەرمەکەی نەبوو.

ئەمڕۆ پێنجشەممە، ٣٠/۷/٢٠٢٦، هێزە حکوومەتییەکان لە ڕێگەی پەیوەندییەکی تەلەفۆنییەوە داوایان لە بنەماڵەی کرمانی کرد بۆ وەرگرتنەوەی تەرمی کوڕەکەیان سەردانی نەخۆشخانەی بووعەلی بکەن. بنەماڵەکەش تەنها دوای ئەم پەیوەندییە لە گیانبەختکردنی کوڕەکەیان ئاگادار بوونەوە.

مادێح کرمانی خێزاندار، باوکی دوو منداڵ، خەڵکی گوندی خێرئاوا و دانیشتووی شاری مەریوان بوو.