ئومێد بێهزاد، خوێندکاری کورد و پوریا سەفوەت، هاووڵاتیی تورک، لە بەندیخانەی ناوەندیی ئورمیە لەسێدارە دران

دووشەممە، ۳/۸/٢٠٢٦

سزای لەسێدارەدانی دوو بەندکراو بە ناوەکانی ئومێد بێهزاد، خوێندکار و هاووڵاتیی کوردی خەڵکی ئورمیە، و پوریا سەفوەت، هاووڵاتیی تورک، کە لە ماوەی شەڕی ٤٠ ڕۆژەدا بە تۆمەتی «سێخوڕی بۆ ئیسرائیل (مووساد)» دەستبەسەر کرابوون، بەرەبەیانی ڕۆژی دووشەممە، ۳/۸/٢٠٢٦، لە بەندیخانەی ناوەندیی ئورمیە جێبەجێ کرا. هێشتا تەرمی ئەم دوو بەندکراوە ڕادەستی بنەماڵەکانیان نەکراوەتەوە.

بەپێی زانیارییەکانی گەیشتوو بە ڕێکخراوەکانی مافی مرۆڤ، سزای لەسێدارەدانی ئومێد بێهزاد و پوریا سەفوەت لە کاتێکدا جێبەجێ کرا کە تەنها دوو ڕۆژ پێشتر، لە ١/۸/٢٠٢٦، دیوانی باڵای وڵات بڕیاری لەسێدارەدانی ئومێد بێهزادی هەڵوەشاندبووەوە.

ئومێد بێهزاد، تەمەنی ٢١ ساڵ، خەڵکی ئورمیە و خوێندکاری زانکۆی ئازادی ئیسلامیی لقی ئورمیە بوو. ناوبراو لە مانگی ۷ی ٢٠٢٦، چەند ڕۆژ دوای دەستپێکردنی شەڕی ٤٠ ڕۆژە، دەستبەسەر کرا. سەرەڕای ئەوەی پارێزەری دۆسیەکە توانیبووی بڕیاری لەسێدارەدانەکە لە دیوانی باڵای وڵات هەڵبوەشێنێتەوە، دەزگا ئەمنی و دادوەرییەکان بەبێ ڕەچاوکردنی ئەو بڕیارە، بەرەبەیانی ٣ی ۸ی٢٠٢٦ سزاکەیان جێبەجێ کرد. هەروەها، لە ٢ی ۸ی٢٠٢٦، بنەماڵەی ئەم دوو بەندکراوە بۆ دوایین چاوپێکەوتن بانگهێشت کرابوون.

بەپێی سەرچاوە ئاگادارەکان، تەنها هۆکاری دەستبەسەرکردن و ئاراستەکردنی تۆمەتی ئەمنی دژی ئەم خوێندکارە ٢١ ساڵە، بەکارهێنانی فلتەرشکێن و دەستڕاگەیشتن بە ئینتەرنێت لە کاتی پچڕانی سەراسەریی ئینتەرنێت، هەروەها ئەندامێتیی پێشووی لە کەناڵی تێلێگرامیی «ئێران ئینتەرنەشناڵ» بووە. بنەماڵەکەی بە هیوای چارەسەریی ئاشتییانەی دۆسیەکە، لە بڵاوکردنەوەی هەواڵەکان لە ڕاگەیاندنەکان خۆیان پاراستبوو.

پوریا سەفوەت، هاووڵاتیی تورک، هەمان کات لە ماوەی شەڕی ٤٠ ڕۆژەدا دەستبەسەر کرا و، بەپێی زانیارییەکان، دوای دانپێدانانی زۆرەملێ لەژێر فشار و سیناریۆسازیی دەزگا ئەمنییەکان سەبارەت بە ناردنی وێنە بۆ کەناڵی «ئێران ئینتەرنەشناڵ» و مووساد، سزای لەسێدارەدانی بەسەردا سەپێندرا و بەرەبەیانی ٣ی ۸ی ٢٠٢٦ لەسێدارە درا.

ئاژانسی هەواڵی «میزان»، سەر بە دەزگای دادوەریی کۆماری ئیسلامی، وێڕای بڵاوکردنەوەی هەواڵی جێبەجێکردنی سزاکە و ڤیدیۆی دانپێدانانی زۆرەملێ، لە ئاماژەکردن بە شوێنی وردی جێبەجێکردنی سزاکە خۆی پاراستووە.

جێبەجێکردنی ئەم سزایە، سەرەڕای هەڵوەشاندنەوەی فەرمیی بڕیارەکە لەلایەن دیوانی باڵای وڵات، بە نموونەیەکی ئاشکرای کوشتنی دەوڵەتی و لەسێدارەدانی دەرەوەی چوارچێوەی دادپەروەرانە دادەنرێت. ڕەوتی دادگاییکردنی ئەم دۆسیەیە، کە لەسەر بنەمای دانپێدانانی زۆرەملێ لەژێر ئەشکەنجە، نەبوونی دەستڕاگەیشتن بە دادگاییکردنێکی دادپەروەرانە و شاردنەوەی ڕەوشی دۆسیەکە بووە، بە پێشێلکارییەکی زەق لە دژی ماددەی ٦ (مافی ژیان) و ماددەی ١٤ (مافی دادگاییکردنی دادپەروەرانە)ی پەیماننامەی نێودەوڵەتیی مافە مەدەنی و سیاسییەکان دادەنرێت.

ڕێکخراوەکانی مافی مرۆڤ، وێڕای مەحکوومکردنی توندی لەسێدارەدانی ئومێد بێهزاد و پوریا سەفوەت، داوای پێکهێنانی کۆمیتەیەکی ڕاستیدۆزینەوەی نێودەوڵەتی دەکەن بۆ لێکۆڵینەوە لە لەسێدارەدانە نهێنی و نایاساییەکان و هەروەها پێشێلکارییەکانی مافی مرۆڤ لە ئێران.